पुढचे काही महिने - १७

गुप्तधनाचे योग आणि स्वस्त किमतीचे समभाग या विषयाची चर्चा करताना आणखी काही माहिती या अंकात देण्याचे गेल्या शनिवारी ठरले होते. त्यानुसार आज अशा एका कंपनीची माहिती तुमच्यासमोर ठेवत आहे. या कंपनीने गेली कित्येक वर्षे सतत नफा कमावला आहे. लाभांश वर्षानुवर्षे भागधारकांना देण्याचे औदार्यही या कंपनीत आहे. पुस्तकी किंमत रुपये ७७.११-एका समभागामागे कमावलेला नफा रुपये ६.५२. या वर्षीचा लाभांश २०ज्ञ् आहे. तरीही या समभागाचा भाव केवळ रुपये ४८.०० आहे. जेव्हा पुस्तकी मूल्यापेक्षा बाजारभाव बराच कमी असतो तेव्हा व्यवस्थापनाविषयी मनात संशय येतो. पण या कंपनीचे व्यवस्थापन संशयातीत आहे. एकूण समभागांपैकी ६० टक्के समभाग प्रवर्तकांकडे आहेत आणि त्यांना बाजारभावात रस नाही. त्यामुळे हा समभाग स्वस्तात उपलब्ध आहे. याच प्रवर्तकांच्या इतर कंपन्याही अशीच चांगली कामगिरी करीत आहेत. स्पेशालिटी केमिकल बनवणार्‍या या कंपनीचे नाव आहे दाई-इची-कर्कारीया. उत्सुक गुंतवणूकदारांनी अधिक माहिती जमा करावी.

फ्रीकॉनॉमिक्स

* मान्सून मनासारखा चांगला झाला तर बाजारात एक मोठी तेजीची लाट येईल.
* जर मान्सून वेळेवर आणि हवा तितका पुरेसा झाला नाही तर हिंदुस्थानचा जीडीपी कमी होईल. व्याजाचे दर वाढतील. विकासाचे दर कमी होतील. बँकाचे समभाग स्वस्त होतील. अशावेळी मायक्रो फायनान्स कंपन्या भरपूर नफा करतील. त्यातल्या त्यात सोने तारण ठेवून पैसे देतात त्यांना सोन्याचे दिवस येतील. नाव घेण्यासारख्या दोनच कंपन्या या क्षेत्रात आहेत एक मन्नपूरम आणि दुसरी मुथूत फायनान्स. या क्षेत्रातील इतर कंपन्यांकडे लक्ष देऊ नये.

एप्रिल महिन्याच्या या शेवटच्या शनिवारी ‘पैसा कसा कमवाल’? या मालिकेचा एक टप्पा संपत आला आहे. पुढच्या टप्प्यात टेक्निकल ऍनॅलिसिसचे आणि डे ट्रेडिंगचे सोपे धडे आपण गिरवणार आहोत.

 या वर्षीचा मान्सून व्यवस्थित पार पडला तर अन्नधान्याच्या तुटीमुळे वाढणारी भाववाढ कमी होईल. परंतु वेगवेगळ्या राज्यांतील निवडणुका संपल्यावर कदाचित डिझेलवरील सरकारी नियंत्रण जाण्याची शक्यता आहे. त्यामुळे भाववाढीची एक नवी लाट येण्याची शक्यता आहे. 

saujanya :- fulora, samana.