ऍपल लायन

जून २०११ हा महिना तंत्रज्ञानातील आघाडीवर असणार्‍या गुगल, ऍपल व मायक्रोसॉफ्ट या कंपन्यांनी माहिती व तंत्रज्ञान क्षेत्रात नवीन वैशिष्ट्ये असणार्‍या व नवीन दशकातील ग्राहकांच्या गरजा ओळखून बनवलेल्या गोष्टींनी अक्षरश: गाजवला आहे. ऍपलनेदेखील आपली आजपर्यंतची सर्वश्रेष्ठ संगणक प्रणाली ‘लायन’ जगासमोर आणली.

ऍपल लायन ही ऍपलची आजपर्यंतची सर्वश्रेष्ठ प्रणाली आहे. ही प्रणाली फक्त संगणकापर्यंतच मर्यादित नसून ती आयफोन, आयपॅड व मॅक या कोणत्याही प्रकारच्या डिव्हाईसवर चालणारी एकच प्रणाली आहे. त्यामुळे ऍपलचा संगणक, मोबाईल आयपॅड व आयफोन हे एकाच ‘ऑपरेटिंग सिस्टिम’वर चालणार आहेत. ऍपलच्या स्वत:च्या क्लाऊडवर असणारी ही ऑपरेटिंग सिस्टिम २५० पेक्षा अधिक नवीन वैशिष्ट्ये आपणासाठी घेऊन आली आहे.


प्रमुख वैशिष्ट्ये -



* इंटरनॅशनल व्हॉईस - आजपर्यंत आपण आपल्या आवाजात संगणकाला कमांड देऊ शकत होता. पण ऍपलची नवीन ‘लायन’ जगातील २३ बिल्ट इन भाषांमध्ये आपल्याशी संवाद साधणार आहे. म्हणजेच तुम्ही संगणकाशी जसे बोलू शकता तसेच संगणकदेखील तुमच्याशी बोलू शकेल. याचा फायदा जर तुम्ही संगणकावर एखादी चुकीची गोष्ट केली तर संगणक स्वत: तुम्हाला काय चुकीचे करत आहोत हे बोलून दाखवेल.

* पिक्चर इन पिक्चर झूम - चित्र झूम करण्याचे हे क्रांतिकारी वैशिष्ट्ये याचा वापर करून तुम्ही एखाद्या चित्रातील फक्त एखादा विशिष्ट विभाग तुम्हाला पाहिजे तेवढा झूम करू शकाल.

* सोशल नेटवर्किंग प्रोफाईल - तुमच्या ऍड्रेसबुकमध्ये तुम्ही तुमचे सोशल नेटवर्किंगमधील मित्रमंडळींचे कॉन्टॅक्स व प्रोफाईल सिंक जमा करू शकाल.

* एयर ड्रॉप - वायरलेस नेटवर्कचा वापर करून तुम्ही कोणतीही फाइल एका ठिकाणावरून दुसरीकडे पाठवू शकाल.

* ऑटोसेव्ह - काम करीत असताना लाइट गेली किंवा संगणक बंद पडला तरी ‘लायन’ प्रणालीवर काम करणार्‍यांना काळजी करण्याचे काहीही कारण नाही कारण ‘लायन’ प्रणाली स्वत: तुम्ही काम करीत असलेल्या सर्व फाइल्स ‘ऑटो सेव्ह’ करीत राहणार आहे.


* फेसटाइम - फेसटाइम हे ‘लायन’मधले सर्वात क्रांतिकारी वैशिष्ट्ये आहे. याचा वापर करून तुम्ही ‘रीयल टाइम’ हाय डेफिनेशन व्हिडीओ कॉल करू शकता तेही कोणत्याही आयपॅड, आयफोन किंवा आयपॉडवर.


* फाइल वॉल्ट - आपल्या महत्त्वाच्या फाइल्स किंवा फोल्डर सुरक्षित ठेवण्याचे हे एक सुरक्षित कपाट आहे. त्याचा वापर करून कोणतीही फाइल तुम्ही इनक्रीप्ट करून सुरक्षित ठेवू शकता व ही फाइल तुमच्या व्यतिरिक्त कोणीही वापरू शकणार नाही.

* फोटो बूथ - आपल्याकडील फोटो एडिट व त्यात बदल करण्यासाठी दिलेले हे नवीन वैशिष्ट्य आहे. यात तुम्ही हाय रीझुल्युशन फोटो एडिटिंग करू शकता किंवा त्यात बदल करू शकता.

* रीझूम - जर तुम्ही एखादे काम करता करता संगणक बंद केला तरी काही हरकत नाही. जेव्हा तुम्ही परत संगणक चालू कराल तेव्हा तो ‘रीझूम’ अर्थात शेवटच्या बंद करते वेळेच्या स्थितीत परत चालू होतो त्यामुळे तुम्ही तुमचे अर्धवट राहिलेले काम पुन्हा ‘रीझूम’ करू शकता.

* ऍपल क्लाऊड - तुम्ही तुमची सर्व माहिती किंवा तुमच्या संगणकावर/ मोबाईलवर किंवा आयपॉडवरची सर्व माहिती ऍपलच्या क्लाऊडवर जमा करू शकता व तिचा वापर कधीही कुठेही करू शकता. अगदी तुमच्या आयपॅडवरील गाणे तुम्ही तुमच्या आयफोनवरदेखील डाऊनलोड करू शकता व हे नव्या जमान्याच्या ऍपल क्लाऊडमुळे सहज शक्य होईल.

* मॅक ऍप स्टोअर - ऍपलने आपल्या आयपॅड, मॅक, आयफोनला लागणारी सर्व सॉफ्टवेअर व ऍप्लिकेशन्स त्यांच्या आयय्युनच्या माध्यमातून त्यांच्या नवीन मॅक ऍप स्टोअरला वितरीत करण्यास सुरुवात केली आहे. त्यामुळे तुम्हाला हवे ते ऍप्लिकेशन तुम्ही थेट ऍपलच्या मॅक ऍप स्टोअरमधून डाऊनलोड करू शकता व त्यासाठी तुम्हाला कोणत्याही सिडी/ डिव्हिडीची गरज पडणार नाही.

 

टेक्नोलॉजीविषयी माहिती वाचून वाचकांनी टेक्नोसॅव्हीला मेल पाठवून खूप शंका विचारल्या त्यातल्याच काही निवडक प्रश्‍नांना या सदरातून टेक्नोसॅव्ही उत्तरे देणार आहेत वाचकांनी आपले प्रश्‍न Techno.savvy@live.com  या मेलवर जरुर विचारावे


वाचकांचे प्रश्‍न -

आपण एका मोबाईलवरून दुसर्‍या मोबाईलमध्ये एखादे सॉफ्टवेअर कॉपी करू शकतो का? व त्यासाठी कोणते सॉफ्टवेअर इंस्टॉल करावे लागते.

- जे. डी. माळी


उत्तर -

मोबाईल निर्मिती करणार्‍या कंपनीचे मूळ सॉफ्टवेअर जे तुमच्या मोबाईलमध्ये इन्स्टॉल केलेले असते त्याला (ध्र्ंिश् सॉफ्टवेअर) असे म्हणतात, असे कोणतेही सॉफ्टवेअर आपण एका मोबाईलवरून दुसर्‍या मोबाईलमध्ये कॉपी करू शकत नाही व त्यासाठी बाजारपेठेत कोणतेही सॉफ्टवेअर उपलब्ध नाही. तुम्ही मूळ सॉफ्टवेअरव्यतिरिक्त कोणतेही सॉफ्टवेअर इतर ठिकाणावरून डाऊनलोड किंवा इन्स्टॉल केले असेल, अशी सॉफ्टवेअर मात्र थेट तुमच्या मोबाईलवरून ब्लू टूथ किंवा इतर कोणत्याही प्रकारे शेयर व कॉपी करू शकता.

Techno.savvy@live.com

सौजन्य:- इंद्रधनू, सामना १२०७२०११.