पहाटेचा शिरा

तळकोकणातील सावंतवाडीच्या भारतमातेतील पहाटेचा शिरा एव्हाना संपूर्ण जिल्ह्यात प्रसिद्ध झाला आहे. पहाटेच्या प्रहरी चार वाजता मिळणार्‍या या स्वादिष्ट शिर्‍याला पन्नास वर्षांपेक्षा मोठी परंपरा आहे. सावंतवाडी व परिसरात या शिर्‍याने तृप्त होऊन कित्येकजण आपल्या दिवसाची गोड सुरुवात करतात.
सहदेव रघुनाथ मांजरेकर (वय ९२) यांनी १९५७ साली स्थापन केलेले ‘भारतमाता हॉटेल’ हे सावंतवाडीच्या खाद्यप्रवासातील मैलाचा दगड ठरले आहे. बेळगाव, कोल्हापूर व गोव्याकडे जाणार्‍या-येणार्‍या वाहतूकदारांची गरज म्हणून हा शिरा इतक्या पहाटे उपलब्ध होतो. मात्र गेली पन्नास वर्षे निव्वळ शिरा खाण्यासाठी पहाटे उठणारे कित्येक सावंतवाडीकर आपल्याला भेटतील.
शिर्‍याबरोबरच झुणका आणि नाचण्याची भाकरी, आंबोळी-उसळ, खाजे असे टिपिकल मालवणी पदार्थही भारतमातेत आपल्याला चाखायला मिळतात. त्याशिवाय पुरीभाजी, झणझणीत बाकरवडी, भक्कम पेढा, खव्याचा पेढा असे पर्याय आहेतच. मुंबईच्या लोकल ट्रेनप्रमाणे आमच्या भटारखान्याचे पहाटे साडेतीन ते बारा असे बिझी शेड्यूल असल्याचे संचालक जगदीश मांजरेकर गमतीने म्हणतात. गेली सलग पन्नास वर्षे स्वादिष्ट चव मेेंटेन करण्याची जबाबदारी जगदीश हे आपले भाचे मंदार व गौरवसह लीलया पार पाडतायत. पर्यटनासाठी गोव्यात किंवा सिंधुदुर्गात जात असाल तर या स्वादिष्ट शिर्‍याची चव नक्की चाखा. त्यासाठी मात्र भल्या पहाटे उठावे लागेल.

शाम देऊलकर

सौजन्य :-  फुलोरा , सामना २६०२१६